Akarere ka Rusizi ni kamwe mu turere 30 tugize U Rwanda, ka kaba na kamwe muri 7 tugize intara y’Iburengerazuba, kagizwe n’imirenge 18, utugari 94, imidugudu 596,ingo 84343 ka kaba gatuwe n’abaturage 416179 ku bucucike bw'abaturage 418/Km2hakurikijwe raporo y'ubudehe yo muri 2015.

Akarere ka Rusizi gahana imbibi n’ibihugu 2: igihugu cy’Uburundi mu majyepfo bigabanywa n’Umugezi wa Ruhwa n'igihugu cya Repubulika iharanira demokarasi ya Kongo mu burengerazuba  bigatandukanywa n’ikiyaga cya Kivu n’umugezi wa Rusizi.

Akarere ka Rusizi karangwa n’umutekano usesuye gakomora ku baturage bako bafatanije n’ingabo na Polisi by’igihugu. Uretse Ikiyaga cya Kivu akarere ka Rusizi karangwamo ibintu nyaburanga byinshi byakurura ba Mukerarugendo: Amashyuza ya Bugarama, Ikiyaga cya Kivu, ishyamba rya cyamudongo, Pariki y’Igihugu ya Nyungwe, Umugezi wa Rusizi uzwiho kuba isoko y’amashanyarazi akoreshwa mu muryango w’ibihugu bihuriye ku biyaga bigari (CEPGL), Ikibuga cy’Indege cya Kamembe n’ibigega bya MAGERWA.

Ni Akarere kera ibihingwa byose, haba ibihingwa ngengabukungu na ngandurarugo; ariko kubera ko akarere gashyize imbere gahunda ya Leta yo guhinga ibihingwa biberanye n’agace runaka kandi bishobora gutunga abahinzi bikanabaha amafaranga bishowe ku isoko. Akarere ka Rusizi katoranyije ibihingwa nk’umuceli mu ikibaya cya Bugarama, Icyayi, Ikawa, Imbuto zinyuranye, urutoki, ibigori,ibishyimbo,imyumbati n’ibindi…

Mu karere ka Rusizi kandi hashyizwe ingufu mu bworozi cyane cyane Inka, ihene n’ingurube .Kubera kandi ikiyaga cya kivu, hari n’ubworozi bw’amafi n’isambaza mu kiyaga cya Kivu ntibwibagiranye. Ubu imbaraga nyinshi zir gushyirwa mu bworozi bw’Inkoko n’inkwavu.

Inganda nazo ntizibagiranye, zaba inganda nini n’intoya. Mu nganda nini hari uruganda rwa CIMERWA rukora isima,Uruganda rutunganya Icyayi rwa Shagasha,Uruganda rwa Nyiramugengeri rwa Gishoma naho mu nganda nto n’iziciriritse harimo izitonora kawa zigera kuri 16 n’izitunganya umuceli mu buryo bugezweho zigera kuri 5.

Akarere ka Rusizi ni Akarere kadatangwa mu mihigo kandi iyo gahize karahigura, mu mihigo y’umwaka ushize kaje kumwanya wa 14 mu turere 30 mu mihigo 2016-2017, ariko ubu karahatanira kuzaza mu myanya y’imbere.

Gahunda y’imihigo imaze kuba umuco mu rwego rw’imiyoborere myiza y’igihugu cy’u Rwanda, ni nayo mpamvu guhiga bihera mu muryango ibyo bikanatuma ikizere cy’uko ibyahizwe bishyirwa mu bikorwa bishoboka.